Vrijheid

As vrij weden is: hol jij joe stil
want ik heb wat te zeggen

As vrij weden is: jij aachter traolies, want
dan heuif wij niet benauwd weden
veur aal joen aans weden en dooun en aans
laoten

As vrij weden is: de dag van mörgen
strak bepaolen deur de dag vandaog
een beetie minder dag te laoten weden

As vrij weden is: de deuren sluten
en op het beeldschaarm vrij bekieken
wat veilig oet de buurt weden moet

As vrij weden is: aal rustig slaopen
omdat aandern de tong moedwillig
ofpakt is

As vrij weden is: eten wat en wanneer oj willen
mor de schillen vallen laoten in de kraanten
waor of honger verzwegen wordt

As vrij weden is: niet weeiten heuiven wat of mij
vrijmaokt hef, mij vrij holdt, mij
in vrijheid aal daogen gevangen nemp

As vrijheid is: waachten tot de aander
mij bevrijdt van angsten waor ik
heilig op vertrouw

As vrijheid mien gedachten pleistert
As vrijheid om mij hen overal in ‘t ronde
en in mij waait,
mor veur joe niet te vangen is

As vrijheid mij beschaarmt
tegen joen ideeën die veur mij te
aans binnen

As vrijheid veur mij vandaog zo
vanzölfsprekend liekt, en jij niet
weeiten wat of dat beteeikent

Dan is vrijheid munt veur mij
en kop derof veur joe
Dan is vrijheid lucht en willekeurig

Mor steeit het mij misschie wel vrij
om wat van mien grote vrijheid -aw
’t beiden gooudvinden vanzölf
een poosie of een beetie langer
of te staon om joe
van mien verstikkende vrijheid
te bevrijden